Ministrja e Ekonomisë dhe Inovacionit, Delina Ibrahimaj, në rubrikën “Ekonomia flet me fakte”, ka komentuar të dhënat mbi gjendjen ekonomike të familjeve shqiptare dhe politikat fiskale të qeverisë.

Ibrahimaj iu referua një shifre të përfolur se 55% e shqiptarëve nuk e mbyllin dot muajin, duke vënë në dyshim burimin e saj.

“Në asnjë prej institucioneve zyrtare INSTAT, Banka e Shqipërisë, e as në Bankën Botërore nuk ekziston një e dhënë e tillë. Ndoshta bëhet fjalë për ndonjë departament imagjinar statistikor të opozitës, që punon me ndjesi dhe jo me shifra,” u shpreh ministrja.

Sipas saj, faktet zyrtare tregojnë një përmirësim të ndjeshëm ekonomik:

“Pagat janë rritur si asnjëherë më parë. Paga minimale është dyfishuar në më pak se pesë vite. Konsumi dhe kursimet janë rritur. Po, çmimet janë rritur, por pagat janë rritur me një ritëm më të shpejtë se ato. Edhe sipas Bankës së Shqipërisë, vendi ynë ka pasur inflacionin më të ulët në rajon gjatë dy viteve të fundit,” theksoi Ibrahimaj.

Ministrja përmendi gjithashtu masat që, sipas saj, kanë ndihmuar familjet dhe biznesin e vogël:

“Arsimi publik është falas dhe librat për ciklin bazë subvencionohen nga shteti. Çmimi i energjisë elektrike për familjet nuk është rritur, përkundrazi është ulur. Transporti publik ka mbetur pothuajse i pandryshuar. Biznesi i vogël ka taksë zero, ndërsa vetëm 27% e subjekteve janë me TVSH. 99% e bizneseve të vogla përfitojnë nga përjashtimi i tatimit mbi fitimin, që përfaqëson 17 miliardë lekë në vit të mbajtura në xhepat e sipërmarrjes së vogël. Individët me të ardhura deri në 50 mijë lekë në muaj nuk tatohen”, deklaroi ajo.

“Ne do të vazhdojmë të rrisim pagën minimale dhe atë mesatare, duke ndjekur parimin tonë të drejtë: ata që fitojnë më pak, paguajnë më pak. Nuk pretendojmë se gjithçka është perfekte, por kemi vullnetin dhe përgjegjësinë për të bërë më të mirën. Ekonomia flet me fakte dhe rezultate,” deklaroi ministrja Delina Ibrahimaj.

Burimi ATSH