Prezenca e OSBE-së në Tiranë dënoi sot me forcë aktin e dhunshëm të goditjes me armë ndaj gjyqtarit Astrit Kalaja, ndërsa u shpreh se “sulmet kundër gjyqtarëve janë sulme të drejtpërdrejta ndaj shtetit të së drejtës dhe institucioneve demokratike”.

Në një reagim për mediet, Prezenca e OSBE-së shprehet thellësisht e tronditur dhe e hidhëruar nga të shtënat me armë brenda Gjykatës së Apelit në Tiranë, që i morën jetën gjyqtarit Astrit Kalaja dhe plagosën dy persona të tjerë.

“I shprehim ngushëllimet tona familjes dhe kolegëve të gjyqtarit Kalaja dhe u urojmë shërim të shpejtë të plagosurve”, thuhet në reagimin e Prezencës së OSBE-së.

Ndërsa rrethanat e plota të sulmit janë ende nën hetim, Prezenca e OSBE-së shprehet se mirëpret arrestimin e shpejtë të autorit të dyshuar.

Po ashtu Prezenca e OSBE-së në Tiranë thekson rëndësinë e garantimit të vendosjes së drejtësisë përmes një procesi ligjor të plotë e të shpejtë.

“Prezenca e OSBE-së solidarizohet me komunitetin gjyqësor të Shqipërisë dhe mbetet e përkushtuar të mbështesë përpjekjet që forcojnë sigurinë dhe pavarësinë e sistemit gjyqësor”, thuhet në këtë deklaratë.

Ngjarja e rëndë ndodhi sot në Gjykatën e Apelit të Juridiksionit të Përgjithshëm në Tiranë, ku është qëlluar me armë zjarri gjyqtari Astrit Kalaja, i cili për pasojë ka humbur jetën. Nga të shtënat janë plagosur gjithashtu dy persona të tjerë, palë në një proces gjyqësor.

Burimi ATSH