Kryetari i Këshillit të Lartë Gjyqësor, Ilir Rusi, priti sot në një takim pune ambasadorin e Mbretërisë së Bashkuar në Shqipëri, Nicholas Abbott.

Takimi kishte fokus në thellimin e bashkëpunimit dypalësh, veçanërisht në drejtim të forcimit të integritetit dhe zhvillimit profesional në sistemin gjyqësor.

Rusi shprehu vlerësimin për mbështetjen e vazhdueshme britanike, veçanërisht në kuadër të partneritetit gjyqësor, i cili ka krijuar mundësi konkrete për shkëmbim përvojash ndërmjet gjyqtarëve shqiptarë dhe homologëve të tyre britanikë, përmes mentorimit dhe bashkëpunimit në fusha të rëndësishme të sundimit të ligjit.

Ambasadori Abbott, nga ana e tij, vlerësoi rolin e Këshillit në mirëqeverisjen e sistemit gjyqësor dhe theksoi rëndësinë e bashkëpunimit ndërinstitucional për forcimin e kapaciteteve profesionale. Ai theksoi se bashkëpunimi i deritanishëm përbën vetëm një hap fillestar, pasi Mbretëria e Bashkuar mbetet e përkushtuar të mbështesë Shqipërinë në procesin e anëtarësimit në Bashkimin Evropian, duke kontribuar posaçërisht në konsolidimin e institucioneve të drejtësisë dhe në avancimin e reformave të qëndrueshme.

Të dy palët ritheksuan angazhimin për të avancuar iniciativa të reja që synojnë përditësimin dhe profesionalizimin e mëtejshëm të trupës gjyqësore shqiptare, në përputhje me standardet evropiane.

Burimi ATSH