Kryetari i bashkisë së Shijakut, Elton Arbana ka zhvilluar një takim me bashkëatdhetarë shijakas emigrantë në Itali që jetojnë prej vitesh në Pordenone të Italisë. Në këtë vizitë, Arbana u takua me kryetarin e komunës Sacile, Pordenone, Carlo Spagnol, si edhe deputeten dhe zëvëndësministren e Mjedisit, Vannia Gava.

Gjatë këtij takimi, Arbana thotë se u ndanë eksperiencat dhe punët e përbashkëta në shërbim të qytetarëve, ndërsa u shkëmbyen edhe ide dhe perspektiva për të ardhmen e qyteteve të Shijakut dhe Pordenones.

Arbana ftoi miqtë të vizitojnë Shijakun e të shohin nga afër, si u shpreh ai, ndryshimet që kemi bërë pesë vitet e fundit me investimet e mbështetura nga Kryeministri Rama dhe qeveria shqiptare.

“Kjo vizitë zyrtare ishte një tregues për një lidhje të fortë me shijakasit që jetojnë në Itali, si dhe për të forcuar më tej marrëdhëniet dhe mundësitë e bashkëpunimit për projekte të përbashkëta”, tha Arbana.

“Shijakasit që jetojnë prej 20 vitesh në Pordenone, pavarësisht se janë integruar shumë mirë, një pjesë të zemrës së tyre e kanë në Shijak”, u shpreh Arbana.

Burimi ATSH