Linjën e interkonjeksionit 400 kV, Shqipëri-Maqedoni e Veriut, është projekti që do të kontribuojë për zhvillimin e qendrueshëm të ekonomisë shqiptare dhe forcimin e integrimit rajonal në sektorin e energjisë si dhe do të përmirësojë qëndrueshmërinë e furnizimit, tregtinë e energjisë elektrike midis të dy vendeve në veçanti dhe atë rajonale midis vendeve të Ballkanit në përgjithësi.

Kështu u shpreh sot ambasadori gjerman në Shqipëri Karl Bergner, në ceremoninë e përbashkët të fillimit të punimeve në nënstacionin elektrik të Elbasanit ku morën pjesë zëvendëskryeministrja dhe ministre e Infrastrukturës dhe Energjisë Belinda Balluku, zëvendëskryeministri përgjegjës për Çështjet Ekonomike të Maqedonisë së Veriut Fatmir Bytyqi, ambasadori i Bashkimit Evropian në Shqipëri Silvio Gonzato, drejtoresha e Zyrës së KfW-së në Shqipëri Brit Horschke, si edhe autoritete të tjera të larta nga Shqipëria dhe Maqedonia e Veriut.

Projekti financohet nga një kredi prej 50 milionë eurosh të dhënë nga qeveria gjermane përmes Bankës për Zhvillim KfW dhe një granti prej 15.7 milionë eurosh të dhënë nga Bashkimi Evropian përmes Instrumentit të Investimeve për Ballkanin Perëndimor (WBIF), për zbatimin e të cilave është po ashtu mandatuar KfW-ja.

Bergner vuri në dukje se, linja e transmetimit do të përmirësojë integrimin e Shqipërisë në sistemin rajonal të energjisë elektrike dhe do të forcojë lidhjet lindje-perëndim të tensionit të lartë duke mbyllur unazën 400 kV me Greqinë

“Kjo është një arritje e rëndësishme e Partneritetit Rajonal për Klimën, për zbatimin e të cilit është rënë dakort midis vendeve të Ballkanit Perëndimor dhe Gjermanisë gjatë Samitit të Procesit të Berlinit të mbajtur në Tiranë në tetor 2023”, tha më tej ambasadori gjerman në Shqipëri Karl Bergner.

Banka Gjermane për Zhvillim KfW financon Bashkëpunimin Financiar Gjermani-Shqipëri përmes projektesh dhe programesh të ndryshme. KfW siguron grante dhe kredi të buta për investime kyçe në infrastrukturë dhe shërbime konsulence që lidhen me projekte të ndryshme. Bashkëpunimi Gjerman me Shqipërinë ka filluar në vitin 1988. Që nga ai vit, Qeveria Gjermane, përmes KfW-së, ka angazhuar një shumë totale prej mbi një miliardë eurosh për projekte dhe programe zhvillimi. Sektori i energjisë është një nga sektorët kyç të Bashkëpunimit Financiar Gjermani-Shqipëri me një portofol aktiv investimesh prej 386 milionë eurosh.

WBIF është një nismë e përbashkët e Komisionit Evropian, Bankës për Zhvillim të Këshillit të Evropës (CEB), Bankës Evropiane për Rindërtim dhe Zhvillim (BERZH), Bankës Evropiane të Investimeve (BEI), donatorëve dypalësh dhe përfituesve të Ballkanit Perëndimor, e nisur në dhjetor 2009 me qëllimin e ofrimit të asistencës financiare dhe teknike për investime strategjike. Më pas platformës iu bashkuan KfW-ja dhe Banka Botërore. Në dhjetor 2018, Agence Française de Développement (AFD) u bë organizatë pjesëmarrëse në WBIF.