Ambasadori i Gjermanisë në Tiranë, Karl Bergner u shpreh sot se, “po ndjek me shqetësim zhvillimet e fundit në Kuvendin e Shqipërisë”.

“Qytetarët/et e Shqipërisë presin me të drejtë nga parlamenti i tyre që të jetë një forum, ku anëtarët e të cilit të mund të prezantojnë dhe diskutojnë hapur propozime të ndryshme politike”, theksoi Bergner në një reagim.

“Ky shkëmbim duhet të zhvillohet në paqe dhe të drejtohet nga rregullat, që i ka përcaktuar vetë parlamenti”, nënvizoi ai.

Ndaj, shtoi Bergner, “u bëj thirrje anëtarëve të shumicës dhe opozitës në Kuvend që të bashkëpunojnë, me qëllim që të garantojnë, që parlamenti të plotësojë rolin e tij thelbësor kushtetues: kontrollin e ekzekutivit dhe ligjvënien në interes të qytetarëve/eve të përfaqësuar përmes deputetëve”.