Kryeministri Edi Rama priti ministren e Punëve të Jashtme të Kanadasë, Mélanie Joly në kuadër të vizitës zyrtare që kryediplomatja kanadeze zhvilloi sot në vendin tonë.

“Kënaqësi të mikprisja sot Ministren e Punëve të Jashtme të Kanadasë, Mélanie Joly”, shkroi Rama në rrjetet sociale duke publikuar momente nga takimi.

Gjatë vizitës në Tiranë, ministrja Joly zhvilloi një takim me ministren për Evropën dhe Punët e Jashtme, Olta Xhaçka.

Në një deklaratë të përbashkët për mediat, pas takimit, Joly uroi Shqipërinë për kryesimin e Këshillit të Sigurisë së Organizatë së Kombeve të Bashkuara. Ajo foli edhe për marrëveshjen e sigurimeve shoqërore mes dy vendeve.

Vizita e Ministres së Jashtme kanadeze në Shqipëri vjen si pjesë e turit të saj në Evropë, që përfshin Slloveninë, Maqedoninë e Veriut dhe vendin tonë.

Kjo është vizita e dytë e një ministri të Jashtëm kanadez në Tiranë, në harkun kohor prej 9 vitesh.

Vizita e Ministres Mélanie Joly në Shqipëri dëshmon për intensifikimin e shkëmbimeve dhe dialogut politik të nivelit të lartë ndërmjet dy vendeve.