Presidenti Bajram Begaj me ftesë të presidentes së Sllovenisë, Natasha Pirc Musar, do të zhvillojë në datat 13-14 korrik 2023, një vizitë zyrtare në Slloveni.
Ceremonia e mirëseardhjes do të zhvillohet të enjten, 13 korrik në orën 10:00 dhe pas takimeve kokë më kokë dhe mes dy delegacioneve, në orën 11:45, presidentët Begaj dhe Pirc Musar do të japin një konferencë të përbashkët për shtyp, mbi marrëdhëniet midis dy vendeve dhe rezultatet e pritshme të kësaj vizite në marrëdhëniet dypalëshe.
Në qendër të bisedimeve me presidenten e Sllovenisë, Natasha Pirc Musar, do të jenë bashkëpunimi dypalësh, me fokus të veçantë bashkëpunimin ekonomik, integrimi evropian dhe bashkëpunimi rajonal, si dhe efektet e agresionit rus në Ukrainë për vendet e rajonit të Ballkanit Perëndimor, por jo vetëm.
Përveç, ceremonive zyrtare dhe takimeve me presidenten Pirc Musar, Begaj do të zhvillojë takime të veçanta edhe me kryeministrin e vendit, dr. Robert Golob, si dhe kryetaren e Asamblesë Kombëtare, Urshka Kakoçar Zupançiç.
