Nga Bujar Qesja, “Mjeshtër i Madh”

E kam me veten. Se kisha menduar se mund të shkruaj kështu. Rrëmim, apo bubrrim fotosh nga arkiva e pasur, e asaj që quhet jeta ime. Janë tre pamje, i njëjti emër. Jeta ka fillim, ka vazhdim dhe ka edhe një fund.

E kam trajtuar jetën si një avion. Shumë e vështirë ngritja e avionit. Më pas anija ajrore, merr kursin e planifikuar. Këtu ndjehesh komod. Dhe problematika krijohet sërish në ulje. Jo pa shkak, kur avioni përplas “këmbët” në tokë, brenda kubesë përplasin duart. Në kësi rastesh populli thotë:” Qendro me këmbë në tokë”.

Pamja e parë

Nuk po e tregoj se ku ndodhem. Le të kërkoj lexuesi. Por moshën po. Duhet të jetë viti 1957-58. Jam apo s’jam në klasë të parë. Vite të fillimit të jetës, të atij fluturimi që nuk i dihej kursi.

Pamja e dytë

Është viti 1968-69. Maturant. Sfida e jetës troket fuqishëm. Çfarë do të vendos të bëhem? Shumë mendime, baraz një vendim.

Pamja e tretë

Zgjodha foton e meditimit, meditim që vazhdon duke marrë bekimin e detit. Njeriu dhe deti, binom i prekshëm kur jeton në Durrës. I kreva detyrimet. Jetë me përpjekje, ku kam ecur me hap, më pas kam vrapuar, rrëzuar, dëmtuar, mjekuar, ringritur, pranë fataliteteve të ekzistencës, për të ardhur tek ky meditim.

E jeta kështu e paska. E shkurtër thuhet, veçanërisht kur e jeton itensivisht.

Profili i përshtatet vazhdimisisë të ndarë në periudha. Gjykon! Mendon! Reflekton!

Personalisht jam i mendimit, që ndodhem në një fazë të jetës kur kthej kokën, për të parë se si kam ardhur deri këtu. Jam i përqendruar kur gjykoj kështu.

Sfidat vazhdojnë. Tri pamje, tri periudha, tri transformime, po personazh i njëjtë. Jeta në transformim, të ndryshon.

Nëse kam bërë 3-4 mëkate në jetë, të përpiqem t’i ulë sa më shumë, për nuk më falet të bëj të pestin. Nuk kemi kohë kur t’i ndreqim. Kuptoj që edhe në këtë moshë, në mos vrapohet ecet shpejt me hap.
Ditët po i mbushe jo thjesht duke numuruar sa herë merr frymë, por se çfarë vendose në këtë frymë, duke iu kënaqur jetës aktive.

Ju kërkoj ndjesë për këtë meditim timin, duke besuar se është i ngjashëm me secilin prej jush i ndodhur në këtë pozicion.

Atëhere këtu po e mbyll. Tri pamje, tri ndryshime, tri kapituj brenda një jete. Po ecim! Po vazhdojmë!
Me kismet, sa më gjatë!

Durrës: 28 prill 2023