Kryeministri Edi Rama dhe bashkëshortja e tij Linda Rama shtruan mbrëmjen e djeshme një darkë iftari në muajin e shenjtë të Ramazanit dhe në respekt të traditës shumëvjeçare.

Rama ndau sot në rrjetet sociale momente nga kjo darkë e shtruar në mjediset e Pallatit të Kongreseve.

Kryeministri Rama falënderoi të gjithë miqtë për kënaqësinë e Iftarit të mbrëmshëm. “Ju uroj një ditë të mbarë me agjërim të pranuar të gjithë besimtarëve sot në ditën e fundit të muajit të bekuar”, u shpreh Rama.

Fjalën përshëndetëse e mbajti bashkëshortja e Kryeministrit, Linda Rama, tha se “vizioni i paqes dhe progresi i natyrshëm përqafuar natyrshëm nga krejt komunitetet fetare është mishëruar në shëmbëlltyrën rrezatuese të harmonisë fetare, pasuri e çmuar e shqiptarëve, dhuratë e vyer për familjen e kombeve europiane dhe shembull për çdo vend ku shqiptarët jetojnë dhe punojnë”.

Besimtarët myslimanë nisën në 23 mars muajin e Madhërishëm të Ramazanit, gjatë të cilit ata agjërojnë duke plotësuar një nga 5 kushtet e Islamit. Muaji i Ramazanit përfundon sot më 20 prill.