Potenciali i turizmit detar dhe mundësitë që krijojnë marinat e lundrimit për zhvillimin e ekonomisë shqiptare ishin në fokus të Samitit Ballkanik të Ekonomisë Blu, zhvilluar në Marina Orikum, në kuadër të aktivitetit “Balkans Sea Fair”.

Ministri i Turizmit, Kulturës dhe Sportit, Blendi Gonxhja, bëri të ditur se zhvillimi i turizmit detar mund të sjellë më shumë investime, shërbime cilësore dhe mundësi punësimi për komunitetet bregdetare.

Sipas Gonxhes, të ardhurat nga turizmi janë më shumë se dyfishuar në tre vjet, ndërsa netqëndrimet jashtë pikut të sezonit veror janë rritur me rreth 78%.

Ministri theksoi se synimi është që kjo ecuri të përkthehet në përfitime konkrete për ekonominë vendase gjatë gjithë vitit. Sipas tij, rritja e numrit të jahteve që ankorohen, furnizohen dhe mirëmbahen në Shqipëri krijon më shumë të ardhura për bizneset vendase dhe mundësi ekonomike për familjet shqiptare.

Aktiviteti “Balkans Sea Fair” vijon deri më 18 tetor në bregdetin e Vlorës, duke bashkuar lundrimin, aventurën, biznesin dhe argëtimin, me fokus promovimin e potencialit detar dhe turistik të rajonit.

Burimi ATSH