Ministrja e Ekonomisë dhe Inovacionit, Delina Ibrahimaj, vizitoi një prej filialeve të Postës Shqiptare në Tiranë, të dëmtuara nga aktet e dhunës gjatë protestës.

Ibrahimaj theksoi se ka disa filiale të dëmtuara.

“Jam këtu në një nga rrugët kryesore të qytetit të Tiranës dhe mbrapa kemi filialin e Postës Shqiptare, i cili është dëmtuar. Janë disa filiale të dëmtuara këtu. Në këto filiale, qytetarët marrin përditë shërbime: pensionistët marrin pensionet e tyre dhe të ardhurat që i duhen për të siguruar jetesën”, u shpreh ministrja.

Ibrahimaj theksoi se, pavarësisht dëmeve të shkaktuara ndaj pronës publike, shërbimi ndaj qytetarëve do të vijojë.

“Unë dua t’i garantoj të gjithë qytetarët që, pavarësisht goditjeve ndaj pronës publike dhe private, ne jemi të angazhuar që ato të marrin shërbimet e tyre të përditshme”, theksoi ministrja.

Ajo bëri të ditur se pensionistët dhe qytetarët që marrin shërbime pranë filialeve të dëmtuara mund t’u drejtohen filialeve të tjera të Postës Shqiptare.

“Pensionistët, ndonëse mbrapa shohim shkatërrim, mund të drejtohen në të gjithë filialet e tjera dhe të marrin pensionin e tyre, sepse ne jemi këtu për të garantuar që rendi dhe siguria dhe shërbimi ndaj qytetarëve do të vijojë i pandërprerë, pavarësisht atyre që ndodhin në këtë qytet”, tha Ibrahimaj

“Siguria e qytetarëve dhe vijimësia e shërbimeve mbeten prioriteti ynë”, theksoi Ibrahimaj.

Burimi ATSH