Kryeministri Edi Rama priti sot në takim ministrin e Jashtëm të Izraelit, Gideon Sa’ar.

Përmes një reagimi në rrjetin social X, ministri Sa’ar bëri të ditur se Izraeli e vlerëson angazhimin e kryeministrit shqiptar për sigurinë e vendit dhe qëndrimin e tij kundër antisemitizmit dhe terrorizmit.

“Ne e vlerësojmë shumë angazhimin e tij për sigurinë e Izraelit dhe qëndrimin e tij të vendosur kundër antisemitizmit dhe terrorizmit. Ishte një bisedë e thellë rreth avancimit të marrëdhënieve midis vendeve, si dhe situatës në Lindjen e Mesme dhe Ballkanin Perëndimor. Faleminderit, Edi, për miqësinë tuaj të guximshme dhe miqësinë e thellë të Shqipërisë me Izraelin”, shkruan ndër të tjera ministri Sa’ar.

Ai e cilësoi Ramën si një nga liderët më të shquar dhe etikë në botë, ndërsa vlerësoi rolin e tij në arenën ndërkombëtare.

“Pata kënaqësinë të takohem sot në Tiranë me Kryeministrin Edi Rama. Rama e ka udhëhequr Shqipërinë për 13 vjet rresht dhe, sipas mendimit tim, është një nga udhëheqësit më të shquar dhe më etikë në botë sot. Rama është një zë i qartë dhe i guximshëm në skenën ndërkombëtare. Ai është gjithashtu një mik i shquar i Izraelit, i cili na ka qëndruar pranë edhe në kohë sfiduese”, u shpreh Sa’ar.

Burimi ATSH