Kryeministri Edi Rama njoftoi sot hapjen së shpejti të konsullatës shqiptare në Detroit, gjatë një takimi me komunitetin shqiptar në Michigan, SHBA.

Rama tha se hapja e konsullatës vjen pas kërkesave të përsëritura nga komuniteti shqiptar në zonë dhe e cilësoi këtë një vendim të merituar.

Kryeministri u shpreh se prania konsullore do t’u mundësojë shqiptarëve në Michigan të marrin shërbimet e nevojshme më pranë vendbanimit të tyre.

“Të dashur miq, nga ana tjetër dua t’ju jap sot një lajm që besoj është një lajm i mirë për ju sepse kam dëgjuar në mënyrë të përsëritur një kërkesë nga ky komunitet dhe Ministria për Evropën dhe Punët e Jashtme së shpejti do të hapi konsullatën shqiptare në Detroit”, u shpreh Rama

“Dhe përtej shakasë, që në këtë rast është më shumë sesa gjysma e të vërtetës, Shqipëria duhet të jetë pranë jush sa herë ju keni nevojë për të dhe minimumi në rastin tuaj është që Shqipëria ta ketë një derë këtu ku ju të trokisni për të gjitha çështjet konsullore”, u shpreh Rama.

Marrë nga ATSH