Ministri i Punëve të Brendshme, Ervin Demo, zhvilloi një takim pune me drejtorin e Përgjithshëm të Policisë së Shtetit, Skënder Hita, drejtorët e departamenteve dhe drejtuesit vendorë të Policisë në qarqe, ku në fokus ishte rritja e sigurisë dhe forcimi i pranisë policore në territor.

Gjatë takimit, ministri kërkoi më shumë prani të efektivëve në terren, rritje të masave parandaluese dhe reagim më të shpejtë ndaj problematikave që lidhen me sigurinë e qytetarëve.

“Prioriteti mbetet i qartë: më shumë siguri, më shumë prani policore dhe reagim më i shpejtë në çdo cep të territorit. Kërkova më shumë Polici në terren, më shumë parandalim dhe standard më të lartë shërbimi ndaj qytetarëve”, theksoi ai.

Një vëmendje e veçantë iu kushtua edhe sigurisë në shkolla. Sipas ministrit, bashkëpunimi mes Policisë, oficerëve të sigurisë, drejtuesve të institucioneve arsimore dhe strukturave të tjera përgjegjëse duhet të garantojë një mjedis të sigurt për nxënësit.

“Vëmendje e posaçme edhe për sigurinë në shkolla. Prania e Policisë dhe bashkëpunimi me oficerët e sigurisë, drejtuesit e shkollave dhe strukturat e tjera përgjegjëse duhet të garantojnë një mjedis të sigurt për çdo nxënës. Siguria nuk fillon pasi ndodh ngjarja. Fillon me informacionin, trajtimin dhe parandalimin e reagimin në kohë”, theksoi ministri.

Ai theksoi gjithashtu se qytetari duhet ta ndiejë Policinë pranë tij, çdo ditë dhe kudo.

Burimi ATSH