Kryeministri Edi Rama ftoi sot përfaqësuesit e pushtetit gjyqësor për t’u ulur në një tryezë të përbashkët pune për të adresuar temën e sistemit të pagave të magjistratëve në funksion të një zgjidhjeje të qëndrueshme dhe afatgjatë.

Kuvendi miratoi dje ndryshimet në ligjin “Për statusin e gjyqtarëve dhe prokurorëve në Republikën e Shqipërisë”, të ndryshuar”, që i jep zgjidhje pagave të magjistratëve, ligj që u kundërshtua nga institucionet e pushtetit gjyqësor dhe opozita.

Përmes një reagimi në rrjetet sociale, Rama u shpreh se zgjidhja duhet të garantojë përgjithnjë magjistratët, por po ashtu edhe ekuilibrin e gjithëhershëm të piramidës shtetërore të pagave.

Kryeministri theksoi po ashtu se tryeza do të mirëpresë edhe pjesëmarrjen e ekspertëve të Këshillit të Europës, si edhe kontributin e Komisionit Europian për Eficiencën e Drejtësisë.

Më poshtë reagimi i plotë i kryeministrit Rama:

“Uroj dhe besoj që përfaqësuesit e pushtetit gjyqësor, që nga drejtuesit e dy këshillave dhe me radhë drejtuesit e institucioneve të gjyqësorit, do t’i përgjigjen pozitivisht ftesës për t’u ulur së bashku në një tryezë pune pa humbur kohë, e për të adresuar temën e sistemit të pagave të magjistratëve në funksion të një zgjidhjeje të qëndrueshme afatgjatë, e cila i garanton ata përgjithnjë po njëkohësisht garanton edhe ekuilibrin e përgjithëhershëm të piramidës shtetërore të pagave.

E nëse kemi mosdakordësi, na takon t’i trajtojmë me urtësi dhe durim duke dhënë një shembull dinjiteti shtetëror për qytetarët tanë e njëkohësisht edhe për partnerët e Shqipërisë”.