Këshilli Mbikëqyrës i Bankës së Shqipërisë miratoi sot ndryshime në rregulloren “Për veprimtarinë valutore”, me synim thjeshtimin e procedurave për kryerjen e transfertave dhe përshtatjen e kuadrit rregullator me zhvillimet e reja në fushën e pagesave digjitale.

Ndryshimet parashikojnë heqjen e kërkesës për paraqitjen e dokumentacionit specifik justifikues për transfertat korrente ndërmjet rezidentëve dhe jorezidentëve.

Çfarë do të thotë kjo në praktikë?

Në terma konkretë, qytetarët dhe bizneset do të kenë procedura më të thjeshta kur kryejnë transferta valutore që hyjnë në kategorinë e transfertave korrente. Pra, për këto transferta nuk do të kërkohet më që klienti të paraqesë dokumente specifike për të justifikuar pagesën, për sa kohë që transaksioni përmbush kërkesat e tjera ligjore.

Kjo pritet të reduktojë dokumentacionin dhe kohën e nevojshme për kryerjen e transfertave, duke e bërë procesin më të përshtatshëm për pagesat elektronike dhe shërbimet bankare online.

Ndryshimi lidhet edhe me zhvillimet e reja në sistemin e pagesave, përfshirë integrimin me SEPA-n, zhvillimin e Open Banking dhe pagesat e menjëhershme. Këto zhvillime synojnë që transfertat dhe pagesat ndërkufitare të kryhen në mënyrë më të shpejtë, të thjeshtë dhe të automatizuar.

Megjithatë, heqja e dokumentacionit specifik justifikues nuk do të thotë se transfertat do të kryhen pa kontrolle. Bankat dhe subjektet e tjera që i nënshtrohen rregullores do të vijojnë të zbatojnë detyrimet që përcakton legjislacioni për parandalimin e pastrimit të parave dhe financimit të terrorizmit.

Ndryshimet sjellin gjithashtu harmonizimin e përkufizimeve të termave “rezident” dhe “jorezident” me standardet ndërkombëtare, duke u bazuar në parimin e rezidencës ekonomike.

Në praktikë, kjo do të thotë se përcaktimi nëse një person apo subjekt konsiderohet rezident ose jorezident do të lidhet me vendin ku zhvillohet dhe ushtrohet veprimtaria e tij ekonomike, në përputhje me standardet ndërkombëtare.

Sipas Bankës së Shqipërisë, ndryshimet synojnë të modernizojnë kuadrin rregullator, të lehtësojnë procedurat për qytetarët dhe bizneset dhe ta përshtatin atë me transformimin digjital të sistemit të pagesave.

Gjithajshtu në mbledhjen e sotme BSH miratoi kryerjen e veprimtarisë financiare shtesë nga Banka ProCredit sh.a.

Në bazë të këtij vendimi, Banka ProCredit sh.a. do të kryejë veprimtarinë financiare shtesë të ndërmjetësimit në sigurime dhe risigurime, në rolin e agjentit.

Burimi ATSH