Ministri për Evropën dhe Punët e Jashtme, Ferit Hoxha zhvilloi sot një takim me ministren e Jashtme austriake, Beate Meinl-Reisinger, në kuadër të pjesëmarrjes në Forumin Evropian në Alpbach (Austri).

Hoxha i shprehu homologes austriake mirënjohjen mbi mbështetjen e vazhdueshme të Austrisë për rrugën e Shqipërisë drejt BE-së.

Gjatë takimit u theksua roli i palëkundur që luan Austria në nxitjen dhe mbështetjen e perspektivës evropiane për Ballkanin Perëndimor, përfshirë edhe përmes udhëheqjes së saj në grupin e “Miqve të Ballkanit Perëndimor”.

Ministri Hoxha shtoi se “partneriteti ynë ekonomik është më i fortë se kurrë dhe se Austria mbetet një nga investitorët kryesorë strategjikë në Shqipëri”.

“Së bashku diskutuam mënyrat për ta zgjeruar më tej këtë gjurmë në fushat me interes të përbashkët”, deklaroi Hoxha pas takimit.

Sipas ministrit, lidhjet e ngushta mes dy vendeve reflektohen edhe në numrin në rritje të vizitorëve austriakë në Shqipëri çdo vit.

Në takim u diskutua gjithashtu kompleksiteti në rritje i peizazhit gjeopolitik evropian dhe global.

“Shqipëria dhe Austria qëndrojnë së bashku në avancimin e stabilitetit rajonal, forcimin e rezistencës ndaj kërcënimeve hibride në zhvillim, përfshirë FIMI-n, dhe kontributin për një Evropë më të fortë, më elastike dhe të bashkuar”, deklaroi Hoxha.

Burimi ATSH