Të ardhurat e derdhura në buxhetin e shtetit nga Shërbimi Përmbarimor Gjyqësor Shtetëror janë rritur me 26,6% gjatë periudhës janar-korrik 2026, krahasuar me të njëjtën periudhë të një viti më parë.

Ministri i Drejtësisë, Toni Gogu ndau në rrjetet sociale statistikat e shtatëmujorit, duke theksuar se rritja e të ardhurave shoqërohet edhe me lehtësimin e marrjes së shërbimeve nga qytetarët.

Sipas të dhënave, gjatë periudhës janar-korrik 2025 janë realizuar 66.006.421 lekë të ardhura, ndërsa të ardhurat e derdhura në buxhet gjatë janar- korrik 2026 kanë arritur në 83.564.613 lekë.

Në fokus është edhe digjitalizimi i shërbimeve. Gjatë kësaj periudhe janë ofruar online, përmes platformës e-Albania, 1762 vërtetime, ndërsa numri i pensioneve ushqimore të trajtuara ka arritur në 8297.

Gjithashtu gjatë janar-korrikut 2026 janë regjistruar 57.360 dosje përmbarimore, ndërsa 5186 çështje janë ekzekutuar tërësisht. Po gjatë kësaj periudhe, 6424 çështje kanë marrë zgjidhje ligjore, ndërsa janë paraqitur 932 kërkesa të reja për ekzekutimin e vendimeve gjyqësore.

“26,6% më shumë të ardhura, krahasuar me një vit më parë. Më pak hapa e më pak lodhje për qytetarin, falë vërtetimeve online në e-Albania”, u shpreh Gogu.

Sipas ministrit, eficienca e shërbimit përmbarimor është e lidhur drejtpërdrejt me zbatimin e vendimeve gjyqësore. “Sepse drejtësia nuk përfundon te vendimi. Ajo merr vlerë kur ky vendim zbatohet”, theksoi ai.

Burimi ATSH