Ministri i Mbrojtjes, Ermal Nufi, deklaroi sot se vendimi për zhvillimin e samitit të ardhshëm të NATO-s në Tiranë përbën një moment me rëndësi strategjike për Shqipërinë dhe shprehje të qartë të besimit të aleancës ndaj rolit të vendit tonë në sigurinë kolektive.

Në një konferencë për shtyp me gazetarët, Nufi u shpreh se në samitin e fundit të NATO-s u konfirmua nga Sekretari i Përgjithshëm i aleancës, Mark Rutte, se samiti i ardhshëm do të zhvillohet në Tiranë.

Sipas ministrit, datat dhe detajet e organizimit do të përcaktohen nga vetë NATO-ja, ndërsa mbajtja e një eventi të këtyre përmasave në Shqipëri dëshmon vlerësimin për vendin si një aleat i besueshëm dhe i përgjegjshëm, si dhe rolin e tij si faktor stabiliteti në rajon dhe më gjerë.

Nufi theksoi se mjedisi ndërkombëtar i sigurisë ka ndryshuar rrënjësisht, duke përmendur luftën në Ukrainë, konfliktet në rajone të ndryshme të botës, kërcënimet kibernetike, luftën hibride dhe zhvillimet e reja teknologjike në fushën ushtarake, të cilat, sipas tij, kanë ndryshuar mënyrën se si shtetet duhet të përgatiten për sfidat e sigurisë.

Ministri Nufi shtoi se “NATO në fazën aktuale është NATO 3.0, një aleancë e fokusuar te gatishmëria, kapacitetet dhe aftësia për t’iu përgjigjur kërcënimeve të reja”.

“Faza e parë e NATO-s lidhej me parandalimin gjatë Luftës së Ftohtë, ndërsa periudha pas saj u karakterizua nga menaxhimi i krizave”, tha Nufi, ndërsa shtoi se NATO-ja e sotme është një aleancë e orientuar drejt forcimit të kapaciteteve mbrojtëse dhe reagimit të shpejtë.

Në këtë kuadër, Nufi tha se Shqipëria po përgatitet për këtë realitet të ri përmes rritjes së investimeve në mbrojtje dhe siguri, forcimit të kapaciteteve ushtarake, modernizimit të Forcave të Armatosura, zhvillimit të teknologjisë dhe fuqizimit të strukturave strategjike dhe të mbrojtjes kibernetike.

Marrë nga ATSH