Ambasadori i Italisë në vendin tonë, Marco Alberti, mori pjesë në prezantimin e Health Hub Hospital, (HHH) një spital ekselence europiane që vjen në Tiranë nga Grupi San Donato.

Në fjalën e tij ambasadori Alberti theksoi se “me hapjen e këtij spitali do të sjellim më të mirën që Italia ka dhe do të bëjmë më të mirën tonë që kjo e mirë të forcojë miqësinë strategjike mes dy vendeve”.

“Kemi vullnetin ndërmjet dy vendeve jo për shkak të miqësisë historike të konsoliduar tashmë, por për ta transformuar këtë miqësi në partneritet strategjik. Ajo që kemi vënë re së bashku me kryeministrin Rama është që miqësia duhet transformuar në diçka strategjike dhe nuk ka strategji pa zgjedhje”, tha ai.

Ambasadori Italian u shpreh se “hapi i parë ishte zgjedhja e sektorit shëndetësor një nga zgjedhjet që u bënë pjesë e marrëveshjes së re mes dy qeverive shumë të dëshiruar nga kryeministri Rama dhe të mbështetur edhe nga kryeministrja Meloni që përcaktoi përparësitë dhe shëndetësia është një prej tyre”.

“Po punojmë që shëndetësia të bëhet një shtyllë e bashkëpunimit strategjik mes dy vendeve. Shëndetësia nxit investimet e tjera, mendoj turizmin rritja fantastike e turizmit në Shqipëri kërkon edhe struktura që i shërben turistëve në të ardhmen në shëndetësi”, tha Alberti.

Ambasadori Alberti u shpreh se “qytetarët kanë nevojë për shëndetësinë dhe shtetet duhet të investojnë në shëndetësi dhe marrëdhënia mes dy shteteve duhet të bazohet në këtë”.