Nënstacioni i ri elektrik në Kamzë pritet të sjellë standarde më të larta teknike dhe furnizim më të qëndrueshëm me energji elektrike për konsumatorët e zonës.

Gjatë inspektimit të punimeve në kantier, ministri i Infrastrukturës dhe Energjisë, Enea Karakaçi, tha se projekti po realizohet me mbështetjen e qeverisë shqiptare dhe asaj gjermane.

“Ky është një investim që po realizohet me mbështetjen e qeverisë shqiptare dhe asaj gjermane. Është një projekt ndër më të rëndësishmit në sektorin energjetik. Ndërsa kemi një bashkëpunim më të thellë me qeverinë gjermane në këtë sektor me vlerë 30 milionë euro, që përfshin digjitalizimin e nënstacioneve, këtë nënstacion të ri dhe rehabilitimin e 12 nënstacioneve të tjera”, tha ministri.

Sipas tij, investimi prej 13 milionë eurosh synon modernizimin e rrjetit dhe rritjen e kapaciteteve. “Projekti me vlerë 13 milionë euro synon vendosjen e fiderave të rinj 20 kilovolt”, deklaroi Karakaci.

Administratori i OSSH sh.a Blendian Dalipi, u shpreh se nënstacioni i ri është tërësisht i ri dhe zëvendëson infrastrukturën e vjetër.

“Ky është një nënstacion tërësisht i ri, 120 kilovolt, që do të zëvendësojë të gjitha linjat e vjetra që kanë qenë në funksion në 60 vitet e fundit, duke rritur cilësinë e furnizimit me energji të zonës”, tha ai.

Dalipi theksoi edhe ndikimin që do të ketë ky investim në furnizimin e popullatës.

“Sot 110-120 kV është kapacitet që i përgjigjet nevojave urbane të zonës, ndërsa synohet të përmirësohet më tej cilësia e shërbimit të furnizimit me energji për afro 5 mijë abonentë”, u shpreh ai.

Administratori i OSSH sh.a sqaroi edhe ecurinë e punimeve.

“Në këtë investim aktualisht janë realizuar 40% e punimeve, ndërsa projekti parashikon vendosjen e pajisjeve të reja. Punimet kanë filluar në tetor 2025 dhe objektivi është të përfundojnë në mars 2027”, theksoi ai.

Sipas tij, projekti përfshin edhe zgjerimin e rrjetit.

“Faza e parë e këtij projekti rrit kapacitetin e furnizimit nga 8 megavat në 80 megavat, që është 10 fishi i kapaciteteve dhe do të ndërtohen edhe dy linja të tensionit të mesëm që zëvendësojnë linjat e vjetra. Paralelisht ka filluar edhe faza e dytë për instalimin e 8 fiderave të rinj dhe këtë vit kemi parashikuar ndërtimin edhe të rrjetit të tensionit të ulët”, tha Dalipi.

Ambasadori i Gjermanisë në Tiranë, Karl Bergner vlerësoi bashkëpunimin mes dy vendeve në sektorin e energjisë.

“Ky është një moment i rëndësishëm i bashkëpunimit mes dy vendeve edhe në sektorin e energjisë”, deklaroi ai.

“Kam vizituar më parë nënstacionin e vjetër 60-vjeçar dhe është koha e duhur që po ndërtohet një nënstacion i ri, që do të përmirësojë stabilitetin e furnizimit me energji”, u shpreh ambasadori.

Ai theksoi edhe ndikimin rajonal të investimeve energjetike.

“Kemi bërë përparime edhe në linjën energjetike 400 kilovolt me Maqedoninë e Veriut duke rritur stabilitetin e rrjetit dhe duke krijuar mundësi që Shqipëria të rrisë eksportin e energjisë”, tha Bergner.

“Qasja e qeverisë gjermane është të bashkëpunojmë për përmirësimin e kushteve gjithmonë e më të prekshme për qytetarët dhe sipas standardeve të BE-së për ta mbështetur Shqipërinë në rrugën drejt BE-së”, deklaroi ambasadori gjerman Bergner.

/Burimi ATSH