Kryetari i grupit parlamentar të Partisë Socialiste, Taulant Balla vlerësoi sot konsensusin e arritur mes mazhorancës dhe opozitës për miratimin e ndryshimeve në Rregulloren e Kuvendit.

Në fjalën e tij në seancë plenare, Balla u shpreh se sot ka fituar parlamentarizmi.

“Edi Rama bën marrëveshje dhe sa herë të doni, kur të doni, si ta doni, por thjesht e vetëm duhet të ulemi dhe të flasim. Sa herë do ulemi dhe do flasim, ne do prodhojmë marrëveshje, do prodhojmë lajme të mira. Këtu pastaj ka dhe një gjë tjetër që duhet të jemi shumë të qartë. Sot nuk ka lajm të mirë për opozitën, lajm të keq për shumicën, humbi mazhoranca, fitoi opozita, humbi opozita, fitoi mazhoranca… Jo, sot ka fituar parlamentarizmi”, shtoi Balla.

Por, sipas tij, kërkohet po ashtu që Rregullorja e Kuvendit të zbatohet me konsensus.

“Dhe testin e kemi pas 10 ditësh. Ne duhet të japim të paktën për Rregulloren, modelin për të gjithë dhe ata që na ndjekin që këta njerëz që bëjnë ligjet për të gjithë zbatojnë ligjin e tyre që e kanë të përditshëm, Rregulloren e Kuvendit”, tha Balla.

Më tej, ai theksoi se shumica mbetet e hapur për dialog me opozitën, duke deklaruar se marrëveshjet prodhohen përmes komunikimit dhe jo përmes përplasjes politike.

Sipas Ballës, dakordësia e arritur për Rregulloren e Kuvendit duhet të shihet si një fitore e parlamentarizmit dhe jo si avantazh për njërën palë politike.

Në vijim të fjalës, ai ndaloi edhe te funksionimi i komisioneve parlamentare, procesi i integrimit europian dhe nevoja për ritme më intensive të miratimit të ligjeve në kuadër të afrimit të legjislacionit me standardet e Bashkimit Europian.

“Dëshiroj shumë që të ecim përpara dhe me Këshillin Kombëtar të Integrimit Europian, t’i vëmë në funksion të gjitha këto institucione. Komisioni që u ngrit në shtator për herë të parë komisioni për Nismat Qytetare dhe Bashkëpunimin dhe Monitorimin Institucional ka një sfidë të re. Duhet të përmbushin një deficit që na ka ka dalë në punën tonë shumëvjeçare deri tani në Kuvend”, u shpreh Balla.

Marrë nga ATSH