Gjenerallejtënanti në pension, Eric Wendt, i nominuari i presidentit amerikan, Donald Trump për ambasador të SHBA-së në Shqipëri do të raportojë nesër në Komitetin e Jashtëm për nominimin për ambasador amerikan në Tiranë, sipas https://www.congress.gov/.

”Seanca dëgjimore për të shqyrtuar nominimet e Michael Kavoukjian, nga Florida, për t’u bërë ambasador në Mbretërinë e Norvegjisë, Michelle Steel, nga Kalifornia, për t’u bërë ambasadore në Republikën e Koresë, Brock Dahl, nga Merilend, për t’u bërë Këshilltar Ligjor, David Brat, nga Virxhinia, për t’u bërë ambasador në Komonuelthin e Australisë, dhe Eric Wendt, nga Kalifornia, për t’u bërë ambasador në Republikën e Shqipërisë, të gjitha nga Departamenti i Shtetit”, thuhet në një njoftim të Kongresit amerikan.

Më 13 prill presidenti Trump, propozoi emërimin e Eric Wendt si ambasadorin e ri amerikan në Shqipëri.

Gjatë më shumë se 34 viteve shërbim aktiv, ai ka mbajtur disa pozicione të larta komanduese.