Ish-trajneri i Kombëtares shqiptare të futbollit, Sylvio Mendes Campos Júnior (Silvinjo) mbylli sot drejtimin e skuadrës shqiptare pas thuajse 3 vite e gjysmë në krye të kuqezinjve.

Në fjalën e tij gjatë prezantimit të trajnerit të ri të Kombëtares shqiptare Silvinjo tha se “si ekip kemi punuar shumë për të përfaqësuar këtë kombëtare”.

“Është një komb që më ka pritur shumë mirë. Tani e njoh shumë mirë Shqipërinë, Tiranën. Dua t’ju falënderoj shumë. Falënderoj Presidentin Duka për punën, besimin, mbi 100 njerëz që punojnë në këtë federatë. Dua të falënderoj gjithë stafin, gjithë futbollistët që kanë bërë një rrugëtim prej 3 vite e gjysmë dhe në fund, tifozët dashamirës të kombëtares”, u shpreh ish-trajneri.

“Më kujtohet që nga dita e parë që kam qenë këtu, kam thënë diçka; shpirti dhe zemra e djersa nuk duhet të mungojë kurrë. Ia kemi dalë të gjithë së bashku, siç e kam thënë gjithmonë. Dua t’ju falënderoj të gjithëve ju që më dëgjoni pas 3 vite e gjysmë. Shumë suksese trajnerit të ri. Faleminderit shumë”, tha Silvinjo.

Burimi ATSH