Ministri për Evropën dhe Punët e Jashtme, Ferit Hoxha zhvilloi një takim në selinë e NATO-s në Bruksel me shqiptarët që punojnë në stafin ndërkombëtar të Aleancës.

Përmes një postimi në platformën X, Hoxha vlerësoi kontributin e profesionistëve shqiptarë në strukturat e NATO-s, duke theksuar rolin dhe përkushtimin e tyre në veprimtarinë e aleancës.

“Kënaqësi të takohesha në Selinë e NATO-s në Bruksel me shqiptarët që punojnë në Stafin Ndërkombëtar të Aleancës dhe që kontribuojnë çdo ditë në veprimtarinë e saj me profesionalizëm dhe përkushtim”, u shpreh Hoxha.

Sipas tij, shqiptarët po dëshmojnë aftësi dhe seriozitet në strukturat më të rëndësishme ndërkombëtare të sigurisë dhe vendimmarrjes.

“Shqiptarët janë sot kudo ku kërkohet punë, meritë, talent dhe seriozitet, edhe në strukturat më të rëndësishme ndërkombëtare të sigurisë dhe vendimmarrjes”, theksoi ministri.

Hoxha nënvizoi se profesionistët shqiptarë në organizatat ndërkombëtare përfaqësojnë denjësisht, jo vetëm veten dhe profesionalizmin e tyre, por edhe emrin dhe vlerat e Shqipërisë.

“Kudo ku ka përgjegjësi, sfidë dhe nevojë për përkushtim, ka edhe shqiptarë që japin më të mirën e tyre”, theksoi Hoxha.

Burimi ATSH