Ministri për Evropën dhe Punët e Jashtme, Ferit Hoxha, i pranishëm në Forumin Diplomatik të Antalias 2026, Turqi, zhvilloi një takim me Nënsekretaren e Përgjithshme për Çështjet Politike dhe Ndërtimin e Paqes, Rosemary DiCarlo

Në një postim në rrjetin social X, Hoxha bëri të ditur se “në një kohë kur bota përballet me sfida gjithnjë e më komplekse dhe multilateralizmi vihet përballë provave të vazhdueshme, diskutimet tona u përqendruan te çështje me rëndësi të veçantë – nga dinamikat e sigurisë globale te stabiliteti rajonal në Ballkanin Perëndimor, si dhe tek domosdoshmëria për të forcuar bashkëpunimin dhe për të mbrojtur rendin ndërkombëtar të bazuar në rregulla”.

“Rikonfirmova partneritetin e palëkundur të Shqipërisë me Kombet e Bashkuara dhe angazhimin tonë të vendosur ndaj parimeve të Kartës së OKB-së, si dhe nevojën për t’ju përgjigjur me vendosmëri kërcënimeve në zhvillim ndaj paqes dhe sigurisë”, shprehet kryediplomati.

Hoxha theksoi se “do vijojmë të punojmë ngushtë me Ekipin e OKB-së në Shqipëri në fusha kyçe që mbështesin drejtpërdrejt prioritetin tonë kombëtar – anëtarësimin në Bashkimin Evropian në kuadër të #Horizon2030 – veçanërisht në prag të Raportit Kombëtar Vullnetar që Shqipëria do të paraqesë në korrik”.

Burimi ATSH