Ambasadori i Bashkimit Evropian në Shqipëri, Silvio Gonzato, theksoi sot rëndësinë e riciklimit dhe kontributit individual në mbrojtjen e mjedisit, gjatë një vizite në Parkun e Ekonomisë Qarkulluese në Fushë-Krujë.

Në një postim në rrjetet sociale, Gonzato tregoi se si dorëzoi materiale të riciklueshme që i kishte mbledhur përgjatë më shumë se dy viteve, duke nënvizuar se çdo veprim i vogël ndikon në mënyrë të drejtpërdrejtë në reduktimin e ndotjes.

“Riciklimi nis me secilin prej nesh. Nga mënyra si i ndajmë mbetjet në shtëpi deri te mënyra si përpunohen më pas, çdo hap ka rëndësi për mbrojtjen e mjedisit”, u shpreh ambasadori.

Ai ndau edhe përvojën e tij personale, duke theksuar se në fillim të qëndrimit në Tiranë e kishte të vështirë të pranonte mungesën e praktikave të ndarjes së mbetjeve, pasi ishte mësuar prej vitesh me riciklimin e materialeve si plastika, qelqi dhe letra.

Ambasadori i BE-së apeloi që qytetarët të përfshihen më aktivisht në riciklim, duke shfrytëzuar mundësitë ekzistuese, si Parku i Ekonomisë Qarkulluese në Fushë-Krujë, për të reduktuar mbetjet që përfundojnë në landfille dhe për të mbrojtur natyrën.

Vizita në këtë park, i mbështetur nga Bashkimi Evropian, synon ndërgjegjësimin e publikut dhe promovimin e praktikave të qëndrueshme në funksion të një mjedisi më të pastër në Shqipëri.

Burimi ATSH