Ministri për Evropën dhe Punët e Jashtme, Ferit Hoxha, priti sot në një takim në ministri anëtarin e Bundestag, Peter Beyer, me të cilin diskutoi mbi një sërë çështjesh me interes të përbashkët, me fokus të veçantë procesin e anëtarësimit të Shqipërisë në European Union.

Në një postim në rrjetin social X, ministri Hoxha theksoi se gjatë takimit u shkëmbyen mendime mbi progresin e arritur deri më tani në rrugën e integrimit evropian, si dhe mbi rëndësinë e vijimit me vendosmëri të reformave kyçe.

Sipas tij, në bisedë u nënvizua gjithashtu angazhimi i përbashkët për të çuar përpara agjendën e zgjerimit të Bashkimit Evropian dhe për të forcuar më tej bashkëpunimin me partnerët.

Hoxha shprehu mirënjohjen për mbështetjen e vazhdueshme të Gjermanisë ndaj rrugëtimit evropian të Shqipërisë, duke vlerësuar rolin e Bundestagut gjerman në këtë proces.

Takimi u vlerësua si një mundësi për të thelluar dialogun dhe bashkëpunimin mes dy vendeve, në funksion të avancimit të reformave dhe përparimit të procesit të integrimit evropian të Shqipërisë.

Burimi ATSH