Ambasadori i Italisë në Shqipëri, Marco Alberti, zhvilloi një takim me Drejtorin e ri të Përgjithshëm të Doganave Shqiptare, Besmir Beja.

“Një bashkëpunim dypalësh me projekte të shumta dhe nisma të reja”,shkruan ambasada italiane në rrjetet sociale.

Postimi i Ambasadës Italiane

🇦🇱| Kemi nisur punën me Drejtorin e ri të Përgjithshëm të Doganave Shqiptare, Besmir Beja! Një bashkëpunim dypalësh me projekte të shumta dhe nisma të reja.

Drejtori i Përgjithshëm i Doganave, Beja, vlerësoi partneritetin e ngushtë me autoritetet italiane dhe mbështetjen e vazhdueshme të Italisë për institucionet shqiptare.

“Italia mbetet një nga partnerët tanë më të rëndësishëm strategjikë. Bashkëpunimi mes administratave tona doganore ka njohur zhvillime të rëndësishme vitet e fundit dhe synojmë ta thellojmë më tej, veçanërisht në drejtim të modernizimit të proceseve dhe forcimit të kontrolleve kundër trafiqeve të paligjshme”, u shpreh ai.

Nga ana e tij, ambasadori Alberti theksoi rëndësinë e bashkëpunimit mes dy vendeve në fushën doganore dhe të sigurisë kufitare, duke nënvizuar se Italia mbështet përpjekjet e Shqipërisë për forcimin e institucioneve dhe avancimin në rrugën drejt integrimit europian.

Gjatë bisedës u diskutua gjithashtu mbi projekte të reja të përbashkëta mes administratave doganore të dy vendeve, përfshirë bashkëpunimin me Guardia di Finanza, si dhe për rinovimin e Planit të Veprimit që synon të thellojë bashkëpunimin operacional dhe institucional mes dy anëve të Adriatikut.

Marrë nga ATSH