Zëvendësministrja e Shëndetësisë dhe Mirëqenies Sociale, Denada Seferi raportoi sot në Komisionin për Nismat Qytetare, Bashkëpunimin dhe Mbikëqyrjen Institucionale lidhur me zbatimin e legjislacionit në fushën sociale gjatë periudhës 2021-2025.

Seferi u shpreh se kontrolli postlegjislativ përbën një mundësi për të vlerësuar aktet e miratuara dhe zbatimin e tyre nga institucionet në varësi.

Ajo renditi tri reforma kryesore të ndërmarra në fushën sociale gjatë kësaj periudhe, duke nisur me reformimin e skemës së ndihmës ekonomike dhe kalimin drejt një programi riintegrimi, me masa ndërinstitucionale për aktivizimin e përfituesve.

Sipas Seferit, ndryshimet në ligjin për asistencën sociale kanë sjellë politika të targetuara për rritjen e përfitimeve për kategori të caktuara, përfshirë nënat kryefamiljare, familjet me shumë fëmijë, si dhe viktimat e dhunës, trafikimit dhe jetimët.

“Ligji i dytë është ligji që ka qenë pjesë e përfshirjes dhe aksesueshmërisë së personave me aftësi të kufizuara. Ky sistem ka ardhur me një model të ri psikosocial, me 37 komisione multidisiplinare dhe një reformë të thellë në të gjithë vendin”, vijoi ajo.

“Për sa i përket reformës së shërbimeve sociale, kemi ardhur me ngritjen e 98 shërbimeve sociale me 46 mijë e 500 përfitues, si familje në nevojë, fëmijë dhe probleme të ndryshme të familjeve, me qendra komunitare në 61 bashkitë e vendit. Fondi social ka zgjeruar shërbimet sociale, por edhe ka ngritur shërbimet e munguara, që sot në Republikën e Shqipërisë mos të kemi asnjë bashki që nuk ka një shportë të shërbimeve sociale apo një planifikim sa i përket planifikimeve territoriale”, theksoi Seferi.

Duke iu referuar kontrollit postlegjislativ për periudhën 2021-2025, Seferi bëri të ditur se për katër ligjet e analizuara janë parashikuar 38 akte nënligjore. Prej tyre, 34 janë miratuar, nga të cilat 26 pa vonesë dhe 8 me vonesë.

Ajo tha se dy akte nënligjore nuk janë realizuar. Njëri lidhet me vendimin e Këshillit të Ministrave për përcaktimin e tarifave të shërbimeve sociale.

“Gjatë konsultimeve me organizata, grupe interesi apo struktura territoriale, kemi pasur një ndikim social negativ në hartimin e këtij vendimi të Këshillit të Ministrave, për sa i përket kostos së shërbimeve sociale”, deklaroi Seferi.

Akti tjetër lidhet me përcaktimin e përfitimeve në natyrë për personat që marrin ndihmë ekonomike. Sipas Seferit, gjatë kësaj periudhe është rishikuar kuadri legjislativ dhe zbatimi i skemës së ndihmës ekonomike është konsoliduar në kuadër të reformës së ndërmarrë.

Burimi ATSH