Pas 14 vitesh mungesë, Festivali i Filmit Shqiptar u rikthye në Tiranë, duke përmbyllur edicionin e tij me një mbrëmje gala dhe ndarjen e çmimeve për krijuesit, regjisorët dhe aktorët më të spikatur të kinematografisë shqiptare.

Çmimi kryesor, Kupa e Festivalit të Filmit, iu dha filmit “Një filxhan kafe dhe këpucë të reja veshur”, me regji të Gentjan Koçit, i cili u shpall fitues i këtij edicioni.

Në kategorinë e aktrimit, çmimi për Aktoren më të Mirë iu dha Adriana Matoshit për interpretimin në filmin “Luna Park”, ndërsa Çmimi për Aktorin më të Mirë shkoi për Blerim Destanin, për rolin në “Amsterdam Express”.

Çmimi për Regjisorin më të Mirë iu dha Gjergj Xhuvanit, ndërsa çmimi për Producentët më të Mirë u fitua nga Dritan Huqi dhe Vjollca Dedej.

Një prej vlerësimeve më të rëndësishme të mbrëmjes ishte Çmimi i Karrierës, që iu dha artistes së mirënjohur Tinka Kurti, në nderim të kontributit të saj të jashtëzakonshëm në kinematografinë dhe teatrin shqiptar.

Në kategoritë e tjera, Çmimi Filmi i Parë shkoi për “Derë e hapur”, me regji të Florenc Papasit; Çmimi i Muzikës më të Mirë për “Bolero në vilën e pleqve”, me muzikë të Endri Sinës; Çmimi për Skenarin më të Mirë për “Liqeni im”, me regji të Gjergj Xhuvanit; Çmimi për Producentin më të Mirë për “Amsterdam Express”, me producente Rozeta Ferin, ndërsa Çmimi për Fotografinë më të Mirë iu dha “Derë e hapur”, me fotografi të Sevdije Kastratit.

Festivali u zhvillua nga 3 deri më 12 shtator në disa prej hapësirave kulturore të Tiranës, ku u shfaqën rreth 220 filma të prodhuar nga viti 2012 e deri më sot. Filmat u prezantuan në Universitetin e Arteve, Kinemanë “Agimi”, Piramidën e Tiranës dhe në “Film Zone”, në sheshin “Nënë Tereza”.

Sipas organizatorëve, rreth 20 mijë shikues ndoqën filmat dhe aktivitetet e festivalit gjatë dhjetë ditëve, një tregues i interesit të publikut për kinematografinë shqiptare dhe rikthimin e kësaj ngjarjeje pas një mungese 14-vjeçare.

Në këtë edicion, krijuesit u vlerësuan përmes Jurisë Zyrtare, Akademisë së Filmit dhe votës së publikut. Rikthimi i festivalit synon të rivendosë një traditë të rëndësishme të kinematografisë shqiptare dhe të krijojë një hapësirë të qëndrueshme për promovimin e filmave, autorëve dhe aktorëve shqiptarë.

/Marrë nga ATSH