Kryetarja e bashkisë Durrës, Emirana Sako njoftoi sot se ka nisur puna për ndërtimin e Markatës së Manzës, një investim që synon të mbështesë zhvillimin rural dhe ekonomik të Njësisë Administrative Manzë, në Durrës.

Në një postim në rrjetet sociale, Sako bëri të ditur se projekti do të shërbejë jo vetëm si një hapësirë e re tregtimi, por edhe si pjesë e një strategjie më të gjerë për zhvillimin e zonës, e cila ka potencial të konsiderueshëm bujqësor dhe blegtoral.

Markata do të funksionojë si një pikë qendrore për mbledhjen, tregtimin, shpërndarjen dhe promovimin e prodhimeve ushqimore vendase, duke krijuar më shumë mundësi për fermerët dhe prodhuesit e zonës dhe duke synuar rritjen e vlerës së produkteve të tyre.

Sipas Sakos, investimi pritet të ndikojë gjithashtu në formalizimin dhe standardizimin e aktivitetit tregtar, përmirësimin e kushteve të sigurisë ushqimore dhe krijimin e një hapësire më funksionale e dinjitoze për komunitetin.

Kryebashkiakja e Durrësit nënvizoi se ndërtimi i Markatës së Manzës synon të kontribuojë edhe në përmirësimin e estetikës urbane të zonës, duke i dhënë një funksion të ri hapësirës dhe duke mbështetur zhvillimin e qëndrueshëm të komunitetit.

Burimi ATSH