Kryeministri Edi Rama ka ndarë në rrjetet sociale një video me historinë e një peshkatari nga Vlora.

Në video një peshkatar vlonjat rrëfen historinë e tij. Ai tregon se është rritur me detin dhe se profesionin e ka mësuar që në fëmijëri nga familja.

“Detit nuk i dihet. E di kur shkon e nuk e di kur kthehesh. Mamaja më ka lindur në det. Qysh në fëmijëri e kam ushtruar profesionin e peshkatarit”, shprehet ai.

Peshkatari tregon se ka kaluar gjithë jetën në det dhe se gjatë viteve ka shërbyer e trajnuar rreth 800 peshkatarë.

“Me këtë det jemi rritur, me freskinë e këtij deti jetojmë. Është pjesë e qytetit të Vlorës”, shprehet ai, duke nënvizuar lidhjen e fortë të komunitetit vlonjat me detin dhe profesionin e peshkimit.

Në rrëfimin e tij, ai thekson edhe vlerat që kërkon profesioni i peshkatarit, duke përmendur respektin, durimin dhe përkushtimin ndaj detit.

Burimi ATSH