Presidenti i Komitetit Olimpik Kombëtar Shqiptar (KOKSH), Fidel Ylli po merr pjesë në punimet e Asamblesë së 55-të të Përgjithshme të Komiteteve Olimpike Evropiane (EOC), një prej ngjarjeve më të rëndësishme të kalendarit olimpik kontinental.

Asambleja nisi punimet nën drejtimin e presidentit të EOC, Spyros Capralos, dhe me pjesëmarrjen e presidentes së Komitetit Olimpik Ndërkombëtar (IOC), Kirsty Coventry.

Gjatë dy ditëve të punimeve do të diskutohen sfidat, prioritetet dhe zhvillimet kryesore të lëvizjes olimpike në Evropë.

Në delegacionin shqiptar marrin pjesë gjithashtu sekretari i përgjithshëm i KOKSH, Gerti Shima, si dhe përfaqësues të tjerë të institucionit.

Gjatë aktiviteteve të para të Asamblesë, Fidel Ylli ka zhvilluar takime me drejtues të lëvizjes olimpike evropiane dhe homologë nga vende të ndryshme të kontinentit, duke synuar forcimin e bashkëpunimit dhe rritjen e marrëdhënieve ndërinstitucionale në funksion të zhvillimit të sportit dhe promovimit të vlerave olimpike.

Punimet e Asamblesë do të vijojnë me sesione të dedikuara mbi politikat sportive, zhvillimin e sportit të të rinjve dhe forcimin e lëvizjes olimpike në nivel evropian.

Burimi ATSH