Presidenti i Federatës Shqiptare të Futbollit, Armand Duka, deklaroi se objektivi i Kombëtares shqiptare mbetet kualifikimi në UEFA Euro 2028, ndërsa u shpreh i bindur se nën drejtimin e trajnerit të ri, Rolando Maran, skuadra kuqezi do të zhvillojë një lojë më agresive dhe më sulmuese.

Në një intervistë për emisionin “Ndryshe” në Top Albania Radio, Duka foli për ndryshimin në stolin e Kombëtares, duke theksuar se ndarja me ish-trajnerin Sylvinho erdhi si rezultat i një konsensusi mes palëve për nisjen e një cikli të ri.

“Ky ka qenë konsensusi që kemi gjetur: po, duhet të fillojmë një cikël të ri”, u shpreh kreu i FSHF-së.

Sipas Dukës, Maran është një trajner me eksperiencë të gjatë në futbollin italian dhe me një filozofi loje sulmuese, çka përputhet me nivelin aktual të Kombëtares shqiptare.

“Në ekipet që ka drejtuar Maran kanë qenë ekipe agresive dhe sulmuese. Jam shumë i bindur që me këtë trajner Shqipëria do të luajë më mirë”, deklaroi ai.

Presidenti i FSHF-së bëri të ditur se objektivi i parë i vendosur për trajnerin e ri është fitimi i grupit në UEFA Nations League dhe ngjitja në Ligën B, si dhe kualifikimi në finalet e Kampionatit Evropian.

Duka konfirmoi gjithashtu se trajneri italian do të ketë mundësinë të njohë skuadrën gjatë dy ndeshjeve miqësore ndaj Izraeli dhe Luksemburgu, të cilat do të zhvillohen në stadiumin Air Albania Stadium.

Në intervistë, Duka foli edhe për zhvillimin e futbollit shqiptar, nivelin e kampionatit “Abissnet Superiore”, investimet në infrastrukturë dhe organizimin e Kampionati Europian U-21 2027, që do të mbahet në Shqipëri dhe Serbi.

Ai vlerësoi gjithashtu progresin e ekipeve kombëtare të moshave dhe evidentoi mesfushorin Luis Hasa si një nga talentet më premtues të momentit për futbollin shqiptar.

/Burimi ATSH