Guvernatori i Bankës së Shqipërisë, Gent Sejko priti sot në një takim zyrtar ambasadorin e parë të Indisë në Shqipëri, Ravindra Prasad Jaiswal.

Gjatë takimit u diskutua mbi forcimin e bashkëpunimit ekonomik dhe financiar mes dy vendeve, si dhe mbi zhvillimet ekonomike dhe transformimin teknologjik të sektorit bankar.

Guvernatori Sejko vlerësoi ecurinë pozitive të ekonomisë shqiptare, duke theksuar se vendi vijon të ruajë ritme të qëndrueshme zhvillimi ekonomik. Ai nënvizoi gjithashtu se sistemi bankar shqiptar mbetet i qëndrueshëm, i mirëkapitalizuar dhe fitimprurës, duke reflektuar stabilitet financiar dhe besim në treg.

Nga ana e tij, ambasadori Jaiswal shprehu vlerësimin për rolin dhe kontributin e Bankës së Shqipërisë në ruajtjen e stabilitetit financiar, si dhe interesin për thellimin e marrëdhënieve ekonomike dhe institucionale mes Shqipërisë dhe Indisë.

“Takimi u konsiderua një hap i rëndësishëm në forcimin e bashkëpunimit ndërmjet dy vendeve, në një kohë kur marrëdhëniet ekonomike dhe teknologjike po marrin një rëndësi gjithnjë e më të madhe”, thuhet në njoftimin për shtyp të BSH-së.

Burimi ATSH