Ministri për Evropën dhe Punët e Jashtme, Ferit Hoxha, së bashku me delegacionin e Bashkimit Evropian në vendin tonë, zhvilluan një diskutim me ambasadorët e shteteve anëtare të Bashkimit Evropian.

Përmes një postimi në rrjetet sociale, Hoxha thekson se gjatë takimit u diskutua procesi i reformave në vazhdim, si dhe gama e plotë e çështjeve që formësojnë marrëdhëniet aktuale Shqipëri-BE, në veçanti procesin e vazhdueshëm të negociatave dhe hapat e ardhshëm.

Sipas Hoxhës, ndër të tjera u ra dakord për rëndësinë e “forcimit të komunikimit dhe shtrirjes së vëmendjes publike mbi procesin e pranimit në BE, si në Shqipëri ashtu edhe në shtetet anëtare të BE-së, me qëllim rritjen e mëtejshme të mirëkuptimit dhe mbështetjes publike”.

“Zgjerimi i BE-së ka qenë gjithmonë po aq i rëndësishëm për vendet kandidate dhe për vetë Bashkimin Evropian, pasi forcon stabilitetin, sigurinë, prosperitetin dhe qëndrueshmërinë demokratike të përbashkët në të gjithë kontinentin, duke përforcuar rolin strategjik dhe besueshmërinë e unionit”, tha Hoxha.

Hoxha falënderoi ambasadorët për mbështetjen e tyre të vazhdueshme ndaj rrugës evropiane të Shqipërisë dhe i siguroi për angazhimin e vendosur për të ndjekur dhe thelluar reformat e kërkuara në udhëtimin e vendit drejt anëtarësimit në Bashkimin Evropian.

Së bashku, theksoi Hoxha, “mbetemi të përkushtuar për të çuar përpara progresin e prekshëm për qytetarët tanë dhe për të forcuar të ardhmen tonë të përbashkët evropiane”.

Burimi ATSH