Ministri i Turizmit, Kulturës dhe Sportit, Blendi Gonxhja, vlerësoi sot rëndësinë e investimeve në sport dhe mbështetjen e talenteve të rinj shqiptarë, duke e cilësuar sportin si krenari kombëtare dhe prioritet të institucionit që ai drejton.

Gonxhja vizitoi palestrën e Shtërmenit në Cërrik, të cilën e cilësoi si një shembull të suksesit që vjen përmes përkushtimit, punës dhe mbështetjes së vazhdueshme ndaj sportit.

Gonxhja theksoi se, nga kjo palestër janë formuar sportistë që kanë fituar medalje europiane, botërore dhe ballkanike, duke përfaqësuar denjësisht Shqipërinë në arenën ndërkombëtare.

Ai veçoi sukseset e Briken Caljes, kampion bote dhe pjesëmarrës në tre Lojëra Olimpike, si edhe të sportistëve të rinj premtues Samuel Rrasa dhe Ertjan Kofsha.

Gonxhja vlerësoi gjithashtu punën e trajnerit Leonard Toska, nën drejtimin e të cilit palestra e Shtërmenit është shndërruar në një vatër kampionësh dhe një forcë të rëndësishme të sportit shqiptar.

“Përmes mbështetjes për sportin elitar, investimeve në infrastrukturë sportive dhe krijimit të mundësive më të mira për të rinjtë, synimi ynë mbetet që gjithnjë e më shumë talente shqiptare të ngjiten në podiumet më të larta ndërkombëtare me flamurin kuqezi”, u shpreh ministri Gonxhja.

Burimi ATSH