Ministri për Evropën dhe Punët e Jashme, Ferit Hoxha pvrcolli sot urimin për Ditën e Evropës, ndërsa ndau në rrjetin social “X” fjalët e presidentit të Këshillit Evropian Antonio Costa për këtë ditë që kujton një nga arritjet më të mëdha politike dhe ekonomike të kontinentit.

“Dita e Europës është dëshmi e kuptimit të paqes, unitetit, solidaritetit dhe bashkëpunimit. Ajo është gjithashtu një kujtesë se këto vlera nuk janë të mirëqena; ato janë fituar me shumë përpjekje dhe nuk duhet të merren kurrë si të garantuara”, shkroi ministri Hoxha.

Kryediplomati shqiptar vlerësoi se Europa u ndërtua mbi bindjen se dialogu është më i fortë se përçarja, solidariteti më i fortë se frika dhe shpresa më e fortë se konflikti.

“Për Shqipërinë, Europa nuk është thjesht një destinacion. Ajo është një zgjedhje vlerash: demokracie, lirie, dinjiteti, shteti të së drejtës dhe përgjegjësie të përbashkët për një të ardhme më të mirë”, theksoi ai.

Sot, ndërsa festojmë Ditën e Europës, vijoi Hoxha, festojmë gjithashtu brezin e ri: ëndrrat, talentin, energjinë dhe besimin e tyre në një kontinent më të hapur, më të drejtë dhe më të bashkuar.

“Shqipëria mbetet fuqimisht e përkushtuar ndaj rrugës së saj europiane, sepse e ardhmja jonë i përket familjes #Europiane, duke qenë të gatshëm të kontribuojmë me kulturën tonë, qëndrueshmërinë tonë dhe besimin tonë të palëkundur në një Europë të bashkuar, të lirë dhe në paqe”, vuri në dukje ministri.

“Gëzuar Ditën e Europës! Sot është gjithashtu edhe Dita e Shqipërisë”, përfundoi ai mesazhin.

Më 9 maj të çdo viti, shtetet anëtare të BE-së festojnë Ditën e Evropës. Në përvjetorin e nënshkrimit të Deklaratës së Shumanit në vitin 1950, kjo është një ditë reflektimi mbi bashkëpunimin, prosperitetin dhe paqen e arritur nëpërmjet projektit evropian.

Burimi ATSH