Ambasadori i Republikës së Shqipërisë në Serbi, Bardhyl Canaj u takua sot me Marko Çadež, President i Dhomës së Tregtisë dhe Industrisë së Serbisë, me të cilin bisedoi për avancimin e bashkëpunimit ekonomik midis Serbisë dhe Shqipërisë, forcimin e lidhjeve të biznesit dhe shfrytëzimin e përbashkët të potencialeve të integrimeve evropiane.

Gjatë bisedës u theksua se bashkëpunimi ekonomik ndërmjet Serbisë dhe Shqipërisë shënon rritje të qëndrueshme dhe të vazhdueshme, gjë që dëshmon cilësinë e tij dhe potencialin afatgjatë. U vu veçanërisht në dukje rritja e numrit të turistëve nga Serbia që vizitojnë Shqipërinë, si një faktor që kontribuon më tej në përmirësimin e marrëdhënieve ndërshtetërore dhe në lidhjen e qytetarëve të dy vendeve.
U shqyrtua gjithashtu nevoja për një lidhje më të fortë ndërmjet ministrive përkatëse të bujqësisë dhe agjencive kompetente, me qëllim shfrytëzimin më të plotë të kapaciteteve dhe potencialeve ekzistuese në këtë fushë.

Bashkëbiseduesit vlerësuan se organizimi i një forumi biznesi, me pjesëmarrjen e përfaqësuesve të institucioneve shtetërore në nivelin më të lartë, do të kishte një efekt të rëndësishëm në forcimin e bashkëpunimit të komuniteteve të biznesit të Serbisë dhe Shqipërisë.

Në bisedë u konfirmua dakordësia mbi rëndësinë e integrimeve evropiane për të dy vendet, ekonomitë e tyre dhe komunitetet e biznesit, duke theksuar nevojën që në masë më të madhe të shfrytëzohen mundësitë që ofron qasja në tregun e përbashkët të BE-së për kompanitë nga Serbia dhe Shqipëria.