Në ditën e lindjes së mbretit Charles III, ambasada britanike në Tiranë, organizoi të premten një aktivitet festiv në Kukës, me synimin për të forcuar urat e bashkëpunimit mes Mbretërisë së Bashkuar dhe Shqipërisë.

Aktiviteti u zhvillua në kuadër të Javës Kulturore Britanike (10-16 Nëntor) nën tematikën “Partners for Progres” dhe frymëzuar nga tradita e njohur britanike e çajit të pasdites, ku u ndanë momente miqësie, dialogu dhe mikpritjeje të përshtatshme për rastin.

Në fjalën e saj, zëvendës ambasadorja, Julia Sutherland u shpreh se “është nder i madh për mua dhe një kënaqësi e madhe, që në emër të ambasadës së Mbretërisë së Bashkuar dhe ambasadorit, të mirëpresim këtu sot në këtë aktivitet kaq të veçantë në kuadër të javës të Kulturës Britanike”

“Sot është ditëlindja e madhërisë së tij Mbretit Charles, ne sot festojmë ditëlindjen e mbretit, por duam ta përdorim këtë ditë, që të festojmë marrëdhëniet mes e dy vendeve tona”.

Kryetari i bashkisë së Kukësit, Albert Halilaj, theksoi se “jemi drejt finalizimit të Shkollës Profesionale, e cila do të jetë një ndihmë shumë e madhe në tregun e punës për t’i ardhur në ndihmë të gjitha profesioneve në qarkun e Kukësit”.

Deputeti Eduard Shalsi në fjalën e tij u shpreh se “ky qark dhe ky qytet ka ndjerë mbështetjen e partnerëve në zhvillimin e projekteve të ndryshme”.

Gjatë aktivitetit u ekspozuan elementë që pasqyrojnë traditën lokale, duke filluar nga veshjet tradicionale, punime artizanale e produkte bujqësore të zonës.