Ministrja e Bujqësisë dhe Zhvillimit Rural, Anila Denaj zhvilloi sot një takim zyrtar me ambasadorin e Mbretërisë së Spanjës në Shqipëri, Gabriel Cremades Ventura.

Gjatë takimit, të dy palët theksuan rëndësinë e forcimit të bashkëpunimit dypalësh në fushën e bujqësisë, si një sektor me potencial të lartë zhvillimi dhe ndikim të drejtpërdrejtë në rritjen ekonomike dhe punësimin në zonat rurale.

Ministrja Denaj deklaroi se diskutimet u përqendruan në identifikimin e mundësive konkrete për zgjerimin e partneritetit përmes trajnimeve dhe projekteve të përbashkëta, të mbështetura nga Bashkimi Europian.

“Diskutuam mbi mundësitë konkrete për thellimin e partneritetit përmes trajnimeve dhe projekteve të mbështetura nga Bashkimi Europian, me fokus te shkëmbimi i përvojës institucionale dhe përgatitja për proceset që shoqërojnë integrimin europian”, u shpreh ministrja Denaj.

Takimi konfirmoi angazhimin e ndërsjellë për të zhvilluar iniciativa që kontribuojnë në modernizimin e sektorit bujqësor në Shqipëri dhe në rritjen e kapaciteteve teknike dhe institucionale për përballimin e sfidave të integrimit në BE.

Eksportet bujqësore shqiptare kanë shënuar rritje të ndjeshme, duke arritur në 570 milionë euro në vitin 2024, krahasuar me vetëm 150 milionë euro në vitin 2013.

Kjo rritje është rezultat i një dekade pune të qëndrueshme, mbështetjes së vazhdueshme për fermerët dhe politikave të orientuara drejt rritjes së prodhimit dhe përmirësimit të standardeve.

Synimi afatmesëm i qeverisë është arritja e 1 miliard eurove eksporte bujqësore deri në vitin 2030.

Përmirësimi i infrastrukturës agrare, nxitja e agroturizmit, skemat e subvencioneve për fermerët, si dhe certifikimi dhe standardizimi i prodhimeve vendase kanë kontribuar në rritjen e konkurrueshmërisë në tregjet ndërkombëtare.

Burimi ATSH