Kryekomisioneri Shtetëror i Zgjedhjeve, Ilirjan Celibashi iu ka bërë thirrje partive politike që të nxisin numëruesit dhe komisionerët në KZAZ-të për përfundimin e procesit të numërimit të votave brenda afatit ligjor që është sot në orën 24:00.

Sipas Celibashit “nuk ekziston asnjë arsye që ky proces të mos përmbyllet brenda këtij afati”.

“Komisioni Qendror i Zgjedhjeve u bën thirrje partive politike që kanë anëtarë në KZAZ dhe në GNV të marrin përgjegjësinë që u takon për të nxitur numëruesit dhe komisionerët në KZAZ-të ku ende nuk ka përfunduar procesi i numërimit të votave, që ky proces të përfundojë brenda afatit ligjor, konkretisht deri në orën 24:00 të ditës së sotme”, shkruan Celibashi.

Celibashi thekson se “duke njohur dhe respektuar të drejtën e kandidatëve për deputet për të vëzhguar dhe mbikëqyrur procesin e numërimit, i ftojmë ata të shmangin çdo përfshirje në komunikime të panevojshme apo ushtrim presioni ndaj numëruesve dhe komisionerëve”.

Sipas Celibashit, “përgjegjësia për mosfinalizimin në kohë të procesit i takon plotësisht partive politike. Komisioni Qendror i Zgjedhjeve ka ndërmarrë dhe po ndërmerr të gjitha përpjekjet për të garantuar mbarëvajtjen dhe përfundimin e procesit”.

Celibashi nënvzion se “nëse situata nuk do të ndryshojë brenda afatit të përcaktuar, me keqardhje njoftojmë se të gjithë personat përgjegjës do të përballen me sanksione ligjore”.

Burimi ATSH