Të mërkurën, në prag të vizitës shtetërore në Rusi dhe të pjesëmarrjes në kremtimet për 80-vjetorin e fitores së Luftës së Madhe Patriotike në Moskë, presidenti kinez Xi Jinping botoi në “Rossiiskaia Gazeta” një artikull me titull “Të mësojmë nga historia për të krijuar një të ardhme të bukur”.

Kreu i shtetit i Kinës shprehet në këtë artikull se, gjatë Luftës Antifashiste Botërore, populli kinez e populli rus luftuan krah për krah dhe e mbështetën njëri-tjetrin, duke farkëtuar një miqësi të thellë me gjak dhe me jetë.

Para 80 vjetëve, forcat e së drejtës në mbarë botën luftuan së bashku duke mposhtur fashizmin. Sot pas 80 vjetëve, unilateralizmi dhe hegjemonia kanë sjellë rreziqe të thella dhe, si pasojë, njerëzimi ndodhet përsëri në një udhëkryq ndërmjet bashkimit ose përçarjes, ndërmjet dialogut ose kundërvënies. “Ne duhet të mësojmë nga historia, të marrim forca nga fitorja e madhe e Luftës Antifashiste, të kundërshtojmë me vendosmëri të gjitha format e hegjemonisë e të politikës së forcës dhe të punojmë së bashku për të krijuar një të ardhme më të mirë për njerëzimin,” u shpreh Xi.

Ai paraqit tre propozime në artikull, duke përfshirë mbajtjen e këndvështrimit të drejtë mbi historinë e Luftës së Dytë Botërore, ruajtjen me vendosmëri të rendit ndërkombëtar të pasluftës dhe mbrojtjen e drejtësisë ndërkombëtare.

Presidenti Xi theksoi se, në situatën e ndërlikuar ndërkombëtare, duhen ruajtur autoriteti i OKB-së, sistemi ndërkombëtar me OKB-në në thelb, rendi ndërkombëtar i bazuar në ligjin ndërkombëtar dhe normat themelore të marrëdhënieve ndërkombëtare që kanë në themel Kartën së OKB-së, duke vijuar promovimin e një bote shumëpolare dhe të një globalizimi ekonomik përfshirës.

Xi Jinping-u theksoi se ky vit shënon 80-vjetorin e çlirimit të Tajvanit. Kthimi i Tajvanit në Kinë është rezultat i fitores së Luftës së Dytë Botërore dhe një pjesë e rëndësishme përbërëse e rendit ndërkombëtar të pasluftës. Deklarata e Kajros, Deklarata e Potsdamit dhe një sërë dokumentesh me fuqi ligjore përcaktuan sovranitetin e Kinës mbi Tajvanin, vuri në dukje ai, duke shtuar që faktet historike e ligjore janë të padiskutueshme dhe autoriteti i rezolutës nr. 2758 të Asamblesë së Përgjithshme të OKB-së nuk mund të sfidohet. Pavarësisht se si ndryshon situata në ishullin e Tajvanit ose se si ndërhyjnë forcat e jashtme në çështjen e Tajvanit, prirja historike e ribashkimit të Kinës është e pandalshme, shprehet presidenti Xi në artikullin e botuar në median ruse.

Burimi CGTN