Kombëtarja shqiptare fitoi 3-0 mbrëmjen e sotme përballë Andorrës në stadiumin “Arena Kombëtare”, në ndeshjen e dytë për eliminatoret e Botërorit 2026.

Golat për Kombëtaren u shënuan nga sulmuesi Rey Manaj në minutat 9 dhe 19.

Trajneri Silvinjo zbriti në fushën e lojës me disa ndryshime nga sfida me Anglinë e 3 ditëve më parë, ku spikatën Broja dhe Manaj në sulm.

Në portë luajti sërish Strakosha; në mbrojtje Balliu, Gjimshiti, Ajeti dhe Aliji. Në mesfushë debutoi Shehu, teksa krah tij ishin dhe Asllani me Laçin. Në sulm luajtën titullarë Hoxha, Manaj dhe Broja.

Këto risi treguan se ishin të duhurat pasi Shqipëria mori menjëherë kontrollin e lojës, me qarkullim të shpejtë të topit, teksa miqtë ishin kujdesshëm në mbrojtje.

Në minutën e 9-të Shqipëria shënoi 1-0. Rey Manaj i dha avantazhin kuqezinjve, teksa shfrytëzoi një krosim në zonë nga Kristjan Asllani dhe me kokë e ndali topin në rrjetë.

Ndërsa në minutën e 19-të Shqipëria dyfishoi rezultatin, pasi Broja kontrolloi mjaft mirë një top të gjatë në zonë dhe pasi mbrapa, ku Rey Manaj nuk e pati të vështirë të realizonte golin e dytë.

Me këtë rezultat u mbyll pjesa e parë, teksa fraksioni i dytë i lojës ishte disi më i ngadaltë, ku Kombëtarja u duk sikur më shumë kërkoi të kontrollonte lojën dhe avantazhin e dy golave.

Pas një pjese të dytë me ritëm të ulët deri mesatar, ishte Uzuni ai që në minutat shtesë gjeti rrugën e rrjetës dhe golin e tretë për Kombëtaren, pasi shfrytëzoi më së miri një kros të ardhur në zonë.

Kjo fitore e ngjit Shqipërinë në vendin e dytë në grupin K me 3 pikë pas Anglisë që kryeson me 6 pikë.