Sektori i tekstileve, veshjeve, lëkurës dhe këpucëve është një shtyllë e rëndësishme e ekonomisë, si për sa i përket punësimit, ashtu dhe eksporteve.

Në konferencën “Drejt një transformimi të qëndrueshëm dhe konkurrues të sektorit TCLF në Shqipëri”, organizuar nga Organizata Ndërkombëtare e Punës (ILO) dhe Zyra e Kombeve të Bashkuara (United Nations Albania), mbajtur në Tiranë, u diskutuan sfidat e viteve të fundit dhe mundësitë për rritjen e këtij sektori, përshtatjen me politikat e BE-së dhe ndërtimin e një industrie më të qëndrueshme.

Ministrja e Shtetit për Sipërmarrjen dhe Klimën e Biznesit, Delina Ibahimaj bëri të ditur se përmes partneritetit të Kombeve të Bashkuara për Objektivat e Zhvillimit të Qëndrueshëm, po punohet për një industri më të gjelbër, më inovative dhe të përputhur me standardet e BE-së.

“Ministria e Shtetit për Sipërmarrjen dhe Klimën e Biznesit do të vijojë të jetë një partner i fortë në këtë transformim, duke mbështetur sipërmarrjet prodhuese, krijuar politika që forcojnë konkurrueshmërinë dhe promovuar modele të reja zhvillimi që garantojnë rritje të qëndrueshme për sektorin”, deklaroi Ibrahimaj.

Sektori i tekstileve dhe fasonëve mbetet një shtyllë kryesore e ekonomisë shqiptare, por ka nevojë për ndryshim strukturor. Qasja tradicionale e fasonëve nuk është e qëndrueshme për të ardhmen, dhe fokusimi në teknologji, markat kombëtare dhe digjitalizimin është thelbësor për të siguruar rritje afatgjatë dhe për t’i dhënë sektorit vlerën që meriton.

Sektori i tekstileve dhe fasonëve kontribuon me rreth 8% në PBB, duke qenë një ndër shtyllat kryesore të eksportit.

Rreth 50% e eksporteve totale të Shqipërisë vijnë nga tekstilet dhe produktet e lidhura me to, me vlerë rreth 105 miliardë lekë në 2024-ën.

Shqipëria eksporton kryesisht këpucë, veshje dhe produkte të përpunuara për tregjet europiane si Italia, Gjermania dhe Greqia.

Llogaritet që sektori fason punëson rreth 100 mijë punonjës, duke përfaqësuar afërsisht 12% të forcës punëtore të formalizuar në Shqipëri.

Burimi ATSH