Kryeministri Edi Rama iu përgjigj sot drejtpërdrejt pyetjeve të adresuara në platformat sociale, nga Berlini ku Shqipëria mban Vendin e Nderit për vitin 2025, nën sloganin “Albania All Senses”.

Rama u shpreh se, stenda e Shqipërisë është e jashtëzakonshme, është një hapësirë gjigante 800 m2 në qendër të panairit të Berlinit.

“Mbrëmja e djeshme ka qenë realisht një goditje shumë në shenjë të vëmendjes”, tha kryeministri, teksa falënderoi gjithë ekipin që u angazhua me shumë përkushtim.

Rama falënderoi të gjithë ata që erdhën nga Shqipëria në Berlin dhe shkëlqyen me performancat e tyre, por shtoi ai, “shkëlqyen edhe mbrapa kuintave, mbrapa skenës dhe ishin tamam “sahat zvicerian”. Bravo, bravo, bravo, një paraqitje e shkëlqyer e Shqipërisë!”.

“A e imagjinoni dot këtë vetëm disa vite më parë?”, pyeti kreu i qeverisë.

“Jo vetëm i Shqipërisë, por të gjitha këto vendet e nderit më përpara i kemi “mbytur” më përpara, i kemi “mbytur” kësaj radhe ne. Për shembull, vjet ishte Gjeorgjia”, tha Rama.

Kryeministri u shpreh se, “kur kemi ardhur vjet që kemi bërë gjithë ato biseda, na shihnin akoma me një lloj skepticizmi gjermanët”.

“Realisht jemi në një situatë që jo s’kemi qenë kurrë, por që do të ishte e vështirë të imagjinohej vetëm deri pak vite më parë. Pak fare. Po ju them prapë që vjet kur kemi ardhur këtu ka qenë jo e lehtë. Ka qenë situatë goxha skeptike. Kemi bërë shumë biseda, por pastaj, vera e vjetshme na ka çliruar shumë, kanë ardhur shumë nga këta pararojat e vëzhgimit për të parë dhe arritëm në afro 400 mijë turistë gjermanë dhe këtë vit synojmë që të kapërcejmë gjysmë milionëshin, të paktën nga turistë gjermanë. Po turistët gjermanë janë vërtetë një lloj testi shumë domethënës sepse janë të ngadaltë në marrjen e vendimit sa të hyjnë në një vend, pastaj janë komplet pushtues. Janë turistë që shpenzojnë në mënyrë domethënëse. Janë turistë që vijnë me të gjitha pretendimet, të gjitha kategoritë, nga ata që ngjiten nëpër male, tek ata që rrijnë shtrirë gjerë dhe gjatë në diell. Kështu që kjo është shumë gjë e mirë që na ka ndodhur”, tha Rama.

Por, shtoi kreu i qeverisë, “nga ana tjetër është imazhi që ka ndryshuar shumë dhe mbrëmë ka marrë një formë shumë të plotë edhe në aspektin e proceseve të tjera, të respektit të dinjiteti, të anëtarësimit në BE, patjetër. Është pak, por e sigurt që përmes turizmit disa vende përpara nesh e thyen akullin dhe kapërcyen malin e paragjykimeve që për ne ka qenë vargmal, nuk ka qenë mal”.