Numri i votuesve nga jashtë të regjistruar në Platformën Elektronike të Zgjedhësve (PER) ka arritur shifrën 100 825, ndërsa deri sot në orën 20:30 janë miratuar 62 387 kërkesa.
Të dhënat janë përditësuar në faqen e Komisionit Qendror të Zgjedhjeve. Sipas të dhënave në bazë të gjinisë, në përqindjen më të lartë të regjistruesve janë meshkujt me 61 168 (60,7%) kërkesa, ndërsa femrat janë 39 657 (39,3%).
Për sa i takon kërkesave për regjistrim sipas grup-moshave, numrin më të lartë të kërkesave e ka grup-mosha 26-35 vjeç me 28 545 kërkesa, më pas grup-mosha 36-45 vjeç me 27 484 kërkesa, nga grup-mosha 46-55 janë regjistruar 19 049 dhe mbi 56 vjeç janë 15 388 kërkesa për regjistrim.
Më të rinjtë, grup-mosha 18-25 vjeç, kanë numrin më të vogël të kërkesave, me 10 359 të tilla. Sipas të dhënave janë refuzuar 36 438 kërkesa.
Kërkesat për regjistrime janë nga vende të ndryshme të botës. Numri më i lartë i kërkesave është regjistruar nga Italia me 36 398, e ndjekur nga Greqia me 27 028, Gjermania me 12 705, si dhe nga SHBA me 7 651.
Sa i takon kërkesave sipas bashkive, numri më i lartë i aplikimeve është për Tiranën me 18 703, më pas bashkia e Fierit me 14 838, Korça me 11 065, Durrësi me 10 004 etj.
Shtetasit shqiptarë që jetojnë jashtë vendit për herë të parë do të kenë mundësi që të votojnë në zgjedhjet parlamentare të 11 majit 2025.
Procesi për regjistrimin në Platformën Elektronike të Zgjedhësve (PER) ka filluar në 11 janar dhe do të zgjasë deri në 4 mars.
