Ministri i Brendshëm Ervin Hoxha zhvilloi një vizitë zyrtare në Pragë, në krye të një delegacioni që përbëhej nga drejtues të Policisë së Shtetit dhe Agjencisë së Aseteve të Sekuestruara dhe të Konfiskuara (AAPSK), ku u prit nga zv.kryeministri dhe ministër i Brendshëm i Republikës së Çekisë, Vit Rakusan.

Dy ministrat bashkëndanë vlerësime për nivelin e dialogut politik, ku Republika Çeke renditet si një nga vendet që ofron mbështetje të palëkundur në rrugën integruese të vendit tonë në BE.

Ministri Hoxha e vlerësoi takimin si shumë të frytshëm dhe miqësor.

“Sapo përfundova një takim miqësor me Ministrin e Brendshëm të Republikës Çeke, i cili më siguroi mbështetjen që do të japë Republika Çeke për anëtarësimin e vendit në Bashkimin Europian. Bashkë me mua, ishte edhe Drejtori i Përgjithshëm i Policisë, për të thelluar bashkëpunimin midis dy policive tona. Vlerësuam bashkërisht komunitetin shqiptar që jeton në Çeki, një komunitet i mirintegruar dhe është një urë lidhëse midis dy popujve tanë.

Homologu çek mirëpriti ftesën për të vizituar Shqipërinë në fillim të muajit qershor, kohë e cila përkon me hapjen e sezonit turistik, ku tashmë e dimë që një pjesë e konsiderueshme e turistëve vijnë edhe nga Çekia”, tha për mediet, ministri Hoxha.

Një tjetër fushë me interes bashkëpunimini mes dy vendeve është ajo për sekuestrimin dhe rikuperimin e aseteve me burim kriminal. Kryeadministratorja Risena Xhaja pati një bisedë me homologët çekë, për të ndarë eksperiencën dhe për të përfituar asistencë dhe përvojë.